శ్రీగాధ బ్రిడ్జి వద్ద రాకపోకలకు అంతరాయం
పోలీసుల చొరవతో వెంటనే తొలగింపు
కోల్ బెల్ట్ న్యూస్(బీబీపేట):
మండలంలో ఆదివారం కురిసిన భారీ వర్షానికి శ్రీగాధ బ్రిడ్జి సమీపంలో భారీ చెట్లు రోడ్డుపై కూలిపోవడంతో కొద్దిసేపు రాకపోకలకు అంతరాయం ఏర్పడింది. వర్షం తీవ్రతకు చెట్లు నేలకొరిగి ప్రధాన రహదారిపై పడటంతో వాహనదారులు ఇబ్బందులు ఎదుర్కొన్నారు.చెట్లు రోడ్డుపై కూలిన విషయాన్ని స్థానికులు పోలీసుల దృష్టికి తీసుకెళ్లారు. సమాచారం అందిన వెంటనే బీబీపేట పోలీస్ సిబ్బంది ఎం.ఏ. ఫైజ్, నవీన్ సంఘటనా స్థలానికి హుటాహుటిన చేరుకున్నారు. పరిస్థితిని పరిశీలించిన పోలీసులు రహదారిపై పడిన చెట్ల కారణంగా వాహనాల రాకపోకలకు ఏర్పడిన ఇబ్బందులను గుర్తించారు.
అనంతరం సంబంధిత అధికారులతో సమన్వయం చేసుకుని కూలిపోయిన చెట్లను రోడ్డుపై నుంచి తొలగించే చర్యలు చేపట్టారు. చెట్లను తొలగించడంతో రహదారి పూర్తిగా అందుబాటులోకి వచ్చి వాహనాల రాకపోకలు సజావుగా కొనసాగాయి.
భారీ వర్షాల నేపథ్యంలో ప్రజలు అప్రమత్తంగా ఉండాలని, అత్యవసర పరిస్థితులు ఎదురైనప్పుడు వెంటనే పోలీసులకు సమాచారం అందించాలని స్థానికులు సూచించారు. వర్షం సమయంలో రోడ్లపై చెట్లు, విద్యుత్ స్తంభాలు కూలిపోయే అవకాశం ఉన్నందున వాహనదారులు జాగ్రత్తగా ప్రయాణించాలని అధికారులు సూచిస్తున్నారు.ప్రజల భద్రతకు ప్రాధాన్యతనిస్తూ బీబీపేట పోలీసులు తక్షణమే స్పందించి రహదారిపై అడ్డంకిని తొలగించడం పట్ల స్థానికులు అభినందించారు.
