119 అసెంబ్లీ నియోజకవర్గాల బాధ్యులతో రాష్ట్ర విస్తృత స్థాయి సమావేశం
ప్రజా సమస్యల పరిష్కారానికి కార్యాచరణపై చర్చ
కోల్ బెల్ట్ న్యూస్ ప్రతినిధి:
తెలంగాణ రక్షణ సేన పార్టీని క్షేత్రస్థాయిలో బలోపేతం చేయడం, ప్రజా సమస్యల పరిష్కారానికి కార్యాచరణ రూపొందించడం లక్ష్యంగా పార్టీ రాష్ట్ర అధ్యక్షురాలు కల్వకుంట్ల కవిత అధ్యక్షతన రాష్ట్ర విస్తృత స్థాయి సమావేశం ప్రారంభమైంది. బంజారాహిల్స్‌లోని పార్టీ కార్యాలయంలో శుక్రవారం నిర్వహిస్తున్న ఈ సమావేశానికి రాష్ట్రవ్యాప్తంగా 119 అసెంబ్లీ నియోజకవర్గాల బాధ్యులు, జిల్లా అధ్యక్షులు, ప్రధాన కార్యదర్శులు, వివిధ అనుబంధ విభాగాల అధ్యక్షులు, కార్యదర్శులు హాజరయ్యారు.
ఈ సందర్భంగా పార్టీ భవిష్యత్‌ కార్యాచరణ, ఏడాది పొడవునా నిర్వహించాల్సిన కార్యక్రమాలు, ప్రజలు ఎదుర్కొంటున్న సమస్యలపై స్పందించాల్సిన తీరు, వాటి పరిష్కారం కోసం చేపట్టాల్సిన ఉద్యమాలు, పార్టీని క్షేత్రస్థాయిలో విస్తరించేందుకు తీసుకోవాల్సిన చర్యలపై కల్వకుంట్ల కవిత నాయకులకు దిశానిర్దేశం చేశారు. రాష్ట్రంలోని ప్రజా సమస్యలను గుర్తించి వాటిపై నిరంతరం పోరాటం చేయడం, ప్రజలకు అందుబాటులో ఉంటూ వారి సమస్యల పరిష్కారానికి కృషి చేయడం, పార్టీ సంస్థాగత నిర్మాణాన్ని మరింత పటిష్ఠం చేయడం వంటి అంశాలపై సమావేశంలో చర్చించారు. నియోజకవర్గాల వారీగా పార్టీ కార్యకలాపాలను విస్తరించడం, నాయకులు, కార్యకర్తల మధ్య సమన్వయాన్ని పెంపొందించడం, ప్రజల్లో పార్టీ కార్యక్రమాలను విస్తృతంగా తీసుకెళ్లడం వంటి అంశాలకు ప్రాధాన్యం ఇచ్చారు.
రాబోయే రోజుల్లో పార్టీ చేపట్టబోయే కార్యక్రమాలకు సంబంధించి నాయకులకు స్పష్టమైన కార్యాచరణ దిశను నిర్దేశించడమే ఈ సమావేశం ప్రధాన ఉద్దేశంగా కొనసాగుతోంది. రాష్ట్రస్థాయి నాయకత్వం నుంచి నియోజకవర్గ స్థాయి బాధ్యుల వరకు సమన్వయంతో పనిచేస్తూ, ప్రజా సమస్యల పరిష్కారాన్ని కేంద్రంగా చేసుకుని పార్టీ కార్యకలాపాలను ముందుకు తీసుకెళ్లడంపై సమావేశంలో దృష్టి సారించారు.
