పోలీసుల అదుపులోకి మావోయిస్టు అగ్రనేత మిసిర్ బెస్రా

నిషేధిత సీపీఐ (మావోయిస్టు) సంస్థకు చెందిన అగ్రనేత, పొలిట్‌బ్యూరో సభ్యుడు మిసిర్ బెస్రా అలియాస్ సాగర్‌ను ఝార్ఖండ్ పోలీసులు అరెస్ట్ చేశారు. అతడిపై ఝార్ఖండ్, ఒడిశా, పశ్చిమ బెంగాల్ సహా పలు రాష్ట్రాల్లో హత్యలు, పేలుళ్లు, ఆయుధ చట్టం, యూఏపీఏ తదితర కేసులు కలిపి మొత్తం 141 క్రిమినల్ కేసులు నమోదైనట్లు అధికారులు వెల్లడించారు. బెస్రా అరెస్టును ఝార్ఖండ్‌లో మావోయిస్టు వ్యతిరేక ఆపరేషన్‌లో కీలక విజయంగా పోలీసులు పేర్కొన్నారు.

పోలీసుల వివరాల ప్రకారం, 65 ఏళ్ల మిసిర్ బెస్రా ఝార్ఖండ్‌లోని గిరిడీహ్ జిల్లా మద్‌నాదిహ్ గ్రామానికి చెందినవాడు. అతడు సాగర్, భాస్కర్, సునీర్మల్, ప్రధాన్ తదితర పేర్లతో కార్యకలాపాలు నిర్వహించేవాడు. మార్చి 31 నుంచి అతడిని పట్టుకునేందుకు ఝార్ఖండ్, ఒడిశా, ఛత్తీస్‌గఢ్ రాష్ట్రాల పోలీసులు సంయుక్తంగా ప్రత్యేక ఆపరేషన్ చేపట్టగా, ధన్‌బాద్ జిల్లా బార్వాడా పోలీస్ స్టేషన్ పరిధిలోని మణియాది ప్రాంతంలో అతడు పోలీసులకు చిక్కాడు.

1986లో మావోయిస్టు సంస్థలో చేరిక

గ్రాడ్యుయేషన్ పూర్తి చేసిన బెస్రా హిందీ, సంతాలి, హో భాషల్లో మాట్లాడగలడు. విద్యార్థి దశలోనే అప్పటి మావోయిస్టు కమ్యూనిస్ట్ సెంటర్ (ఎంసీసీ) నేత ప్రశాంత్ బోస్ అలియాస్ కిషన్ దాతో పరిచయం ఏర్పడినట్లు పోలీసులు తెలిపారు. అనంతరం 1986లో ఎంసీసీలో ప్రాథమిక సభ్యత్వం పొందిన అతడు, 1990లో ప్రచార కార్యక్రమాలు, కోల్‌కతా ప్రాంత కార్యకలాపాల బాధ్యతలు చేపట్టాడు.

మావోయిస్టు సంస్థలో కీలక పాత్ర

1992లో ఝార్ఖండ్‌కు తిరిగి వచ్చిన తర్వాత రాంచీతో పాటు పరిసర ప్రాంతాల్లో మావోయిస్టు నెట్‌వర్క్ విస్తరణలో బెస్రా కీలక పాత్ర పోషించినట్లు పోలీసులు వెల్లడించారు. 1997లో దక్షిణ ఛోటానాగ్‌పూర్ కమిటీ, 2000లో ఝార్ఖండ్ ప్రాంతీయ కమిటీ ఏర్పాటులోనూ అతడి పాత్ర ఉందని తెలిపారు.

2003లో కేంద్ర కమిటీ సభ్యుడిగా నియమితుడైన బెస్రా, 2004లో ఎంసీసీ–పీపుల్స్ వార్ గ్రూప్ విలీనంతో ఏర్పడిన సీపీఐ (మావోయిస్టు)లో పొలిట్‌బ్యూరో, కేంద్ర కమిటీ, సెంట్రల్ మిలిటరీ కమిషన్ సభ్యుడిగా ఎదిగాడు.

సంస్థ వ్యూహకర్తగా గుర్తింపు

మావోయిస్టు సంస్థ సైనిక వ్యూహాల రూపకల్పన, అటవీ ప్రాంతాల్లో పనిచేసే దళాల నిర్వహణ, కొత్త క్యాడర్ల నియామకం, సంస్థకు ఆర్థిక వనరుల సమీకరణలో బెస్రా కీలక పాత్ర పోషించినట్లు పోలీసులు ఆరోపిస్తున్నారు. దాదాపు నాలుగు దశాబ్దాలుగా మావోయిస్టు కార్యకలాపాల్లో చురుకుగా ఉన్న అతడు, దేశంలో అత్యధిక రివార్డు ప్రకటించిన మోస్ట్ వాంటెడ్ మావోయిస్టు నేతల్లో ఒకరిగా గుర్తింపు పొందాడు.

బెస్రా అరెస్టుతో మావోయిస్టు కార్యకలాపాలకు గట్టి ఎదురుదెబ్బ తగిలిందని, అతడి నుంచి కీలక సమాచారం లభించే అవకాశం ఉందని పోలీసులు భావిస్తున్నారు.