by 
Mavoist : మావోయిస్టు ఉద్యమ ప్రస్థానం తెలంగాణ రాష్ట్రంతో ముగింపు పలికే అవకాశాలు ఎక్కువగా కనబడుతున్నాయి. ఇందుకు పలు తార్కాణాలు కూడా నిజమే అంటున్నాయి. ఇప్పటి వరకు రాష్ట్రంలో జరిగిన లొంగుబాట్లు కావచ్చు,. మల్లోజుల, ఆశన్న ప్రకటన కావచ్చు.. ఎన్కౌంటర్లకు తావివ్వకుండా ప్రస్తుతానికి తెలంగాణ రాష్ట్ర ప్రభుత్వం కేవలం లొంగుబాట్లకే ప్రాధాన్యం ఇస్తోంది. కేంద్ర ప్రభుత్వం, ఇతర రాష్ట్రాల సహకారంతో మావోయిస్టులతో చర్చలు లేవు, కేవలం లొంగిపోవాల్సిందేనంటూ అడవుల్లో దూసుకెళుతోంది. దింతో కీలక నాయకులు మహారాష్ట్ర, ఛత్తీస్ ఘడ్, తో పాటు ఇతర ప్రాంతాల్లో బలగాల తూటాలకు బలవుతున్నారు.
తెలంగాణాలో గత కొన్ని లొంగుబాట్లను పరిశీలిస్తే ఎన్కౌంటర్లకు అవకాశం ఇవ్వడం లేదు. లొంగిపోతామంటూ మధ్యవర్తిత్వంతో సంప్రదింపులు జరుపుతున్న మావోయిస్టులను చేరదీస్తొంది. పునరావాసం కల్పిస్తోంది. ఇప్పటి వరకు తెలంగాణలో ఐదుగురు కేంద్ర కమిటీ సభ్యులు, ఒకరు బస్తర్ డివిజన్ కార్యదర్శి,, మరొకరు రాష్ట్ర కమిటీ సభ్యుడు(సికాస కార్యదర్శి) ఉన్నారు. వీరంతా కూడా తెలంగాణ కు చెందిన వారే కావడం విశేషం. గత నాలుగు నెలల నుంచి తెలంగాణాలో కేవలం మధ్యవర్తుల ద్వారా లొంగిపోయిన వారే ఎక్కువగా కనబడుతున్నారు.
రాష్ట్రంలో లొంగిపోయిన కేంద్ర కమిటీ సభ్యులు ఆత్రం లచ్చన్న, సుజాతక్క, మల్లోజుల, ఆశన్న, పుల్లూరి ప్రసాద్ రావ్ ఉన్నారు. అదే విదంగా రాష్ట్ర కమిటీ బాధ్యతలతో పాటు సికాస కార్యదర్శి గా బాధ్యతల్లో ఉన్నకీలక నేత బండి ప్రకాష్, బస్టర్ డివిజన్ కార్యదర్శి(లచ్చన్న భార్య) వనితక్క ఉన్నారు. వీరంతా కూడా తెలంగాణ ప్రాంతం వారే. లొంగుబాటుకు సిద్దమైన కేంద్ర కమిటీ సభ్యుడు హిద్మ ఎప్పుడైతే ఎన్కౌంటర్ అయ్యాడో, అప్పుడే ఏపీ లొంగుబాటుకు అనుకూలమైన ప్రాంతం కాదనేది తెలిసిపోయింది. తెలంగాణ ప్రాంతానికి చెందిన కీలక నాయకులు ఇప్పుడు రాష్ట్రంలోని లొంగుబాట్లను పరిశీలిస్తే ఇక్కడే లొంగిపోవడానికి పలువురు సిద్దమైనట్టుగా తెలుస్తోంది.
ప్రస్తుతానికి కేంద్ర కమిటీ హోదాలో తెలంగాణ నుంచి ప్రాతినిధ్యం వహిస్తున్న వారిలో తిప్పిరి తిరుపతి, ఆజాద్, మల్ల రాజిరెడ్డి, బడే చొక్కారావు, కొయ్యడ సాంబయ్య,, ప్రశాంత్ వంటి కీలక నేతలు ఉన్నారు. వీరంత లొంగిపోతే తెలంగాణ నుంచి మావోయిస్టు పార్టీలో ప్రాతినిధ్యం వహించే వారి సంఖ్య శూన్యం అవుతుంది. అక్కడక్కడ చిన్న, చిన్న నేతలు ఉండొచ్చు. కానీ ప్రధానమైన నేతలు లొంగిపోతే ఉద్యమానికి తెలంగాణ నుంచి తెరపడినట్టే. దింతో తెలంగాణలో ఎన్కౌంటర్లకు తావివ్వకుండా కేవలం లొంగుబాట్లతోనే మావోయిస్టు ఉద్యమానికి ఆరోగ్యకరమైన వాతావరణంలో తెలంగాణ ప్రభుత్వం ముగింపు పలికే అవకాశాలు ఎక్కువగా కనబడు తున్నాయి. ఈ నేపథ్యంలో మా రాష్ట్రంలో మావోయిస్టు పార్టీ లేదనే విషయాన్నీ కేంద్రం వద్ద స్పష్టం చేయడానికి రాష్ట్ర ప్రభుత్వానికి అవకాశం ఉంటుంది.
