బాధిత కుటుంబాలకు ప్రభుత్వం ఆర్థిక సహాయం అందించాలి
పెద్దపల్లి నియోజకవర్గ ఇన్చార్జి సలేంద్ర కొమురయ్య యాదవ్
కోల్ బెల్ట్ న్యూస్(పెద్దపల్లి):
ఆదిలాబాద్ RIMSలో చోటుచేసుకున్న అగ్ని ప్రమాదం, దట్టమైన పొగ కారణంగా చిన్నారులు మృత్యువాత పడిన ఘటన అత్యంత విషాదకరమని తెలంగాణ రక్షణ సేన నాయకుడు, BRS పెద్దపల్లి నియోజకవర్గ ఇన్చార్జి సలేంద్ర కొమురయ్య యాదవ్ అన్నారు. మంగళవారం పెద్దపల్లి జిల్లా కేంద్రంలో ఆయన మాట్లాడుతూ నవజాత శిశువులు చికిత్స పొందుతున్న వార్డులో ఈ ఘటన చోటుచేసుకోవడం తీవ్ర ఆందోళన కలిగించే విషయమన్నారు.
అగ్ని ప్రమాదంలో ముగ్గురు శిశువులు మృతి చెందినట్లు వార్తా నివేదికలు వెల్లడిస్తున్నాయని ఆయన తెలిపారు. చిన్నారులు పొగతో ఉక్కిరిబిక్కిరి అవుతున్న సమయంలో ఆసుపత్రిలోని భద్రతా ఏర్పాట్లు, అత్యవసర స్పందన, సిబ్బంది అప్రమత్తత వంటి అంశాలపై సమగ్ర విచారణ జరపాల్సిన అవసరం ఉందన్నారు. వైద్య ఆరోగ్య శాఖ మంత్రి ఈ ఘటనపై బాధ్యతాయుతంగా స్పందించి, బాధిత కుటుంబాలకు న్యాయం జరిగేలా తక్షణ చర్యలు తీసుకోవాలని తెలంగాణ రక్షణ సేన తరఫున డిమాండ్ చేస్తున్నట్లు కొమురయ్య యాదవ్ తెలిపారు.
తెలంగాణ రక్షణ సేన ప్రధాన డిమాండ్లు
- ఆదిలాబాద్ RIMS అగ్ని ప్రమాదంపై స్వతంత్ర, సమగ్ర విచారణ జరిపించాలి.
- మృతి చెందిన ప్రతి చిన్నారి కుటుంబానికి ప్రభుత్వం తగిన ఆర్థిక సహాయం అందించాలి.
- ప్రభుత్వ ఆసుపత్రుల్లో అగ్ని ప్రమాదాలు, ఇతర అత్యవసర పరిస్థితులను ఎదుర్కొనే భద్రతా చర్యలను మరింత పటిష్ఠం చేయాలి.
- ఆసుపత్రుల్లో అత్యవసర పరిస్థితులపై సిబ్బందికి క్రమం తప్పకుండా శిక్షణ ఇవ్వాలి.
మృతి చెందిన చిన్నారుల కుటుంబాలకు తెలంగాణ రక్షణ సేన అండగా ఉంటుందని కొమురయ్య యాదవ్ తెలిపారు. బాధిత కుటుంబాలకు న్యాయం జరిగే వరకు ఈ ఘటనపై ప్రభుత్వాన్ని ప్రశ్నిస్తామని ఆయన పేర్కొన్నారు.
