రక్తదానం చేసి సేవా స్పూర్తి చాటిన యువత
రక్తదానం చేసిన 60 మంది యువకులు
కోల్ బెల్ట్ న్యూస్(కామారెడ్డి):
కామారెడ్డి జిల్లా బిబిపేట మండలంలో శ్రీ భక్త మార్కండేయ పద్మశాలి సంఘం ఆధ్వర్యంలో ఆదర్శవంతమైన రక్తదాన శిబిరం నిర్వహించారు. సంఘం అధ్యక్షుడు ఆంకాలం నరేందర్, ఉపాధ్యక్షుడు చింతకింది వేణు ఆధ్వర్యంలో నిర్వహించిన ఈ కార్యక్రమానికి KBS బ్లడ్ డొనేషన్ సంస్థ సహకారం అందించింది.
ఈ సందర్భంగా నిర్వహించిన రక్తదాన శిబిరంలో మొత్తం 60 మంది స్వచ్ఛందంగా రక్తదానం చేసి సామాజిక బాధ్యతను చాటుకున్నారు. రక్తదానం ద్వారా అత్యవసర పరిస్థితుల్లో ప్రాణాపాయ స్థితిలో ఉన్న రోగులకు సహాయం చేయవచ్చని నిర్వాహకులు తెలిపారు. ప్రతి ఆరోగ్యవంతుడు నిర్దిష్ట వ్యవధిలో రక్తదానం చేయడం ద్వారా మరొకరి ప్రాణాలను కాపాడవచ్చని అవగాహన కల్పించారు.
కార్యక్రమంలో సంఘ సభ్యులు, యువకులు పెద్ద సంఖ్యలో పాల్గొని శిబిరాన్ని విజయవంతం చేశారు. ఈ సందర్భంగా రక్తదాతలను సంఘ ప్రతినిధులు అభినందించి, వారి సేవాభావాన్ని కొనియాడారు.
ఈ కార్యక్రమంలో రమేష్, పెంటప్ప, బాలరాజు, లింగం, మచ్చేందర్, సంతోష్, శ్రీహరి, శ్రీను తదితరులు పాల్గొన్నారు. అలాగే శ్రీ భక్త మార్కండేయ పద్మశాలి సంఘం సభ్యులు, గ్రామ ప్రముఖులు, యువకులు పాల్గొని కార్యక్రమం విజయవంతం కావడానికి సహకరించారు.
సమాజ సేవలో భాగంగా భవిష్యత్తులో కూడా ఇలాంటి సేవా కార్యక్రమాలను మరింత విస్తృతంగా నిర్వహిస్తామని సంఘ నాయకులు తెలిపారు. రక్తదానం మహాదానమని, ప్రతి ఒక్కరూ రక్తదానానికి ముందుకు రావాలని వారు పిలుపునిచ్చారు.
