ఈ పథకంలో చేరితే మహిళలకు ఎన్ని లాభాలో

కోల్ బెల్ట్ న్యూస్(హైదరాబాద్):

మహిళలు, బాలికల ఆర్థిక భద్రతను బలోపేతం చేయడానికి కేంద్ర ప్రభుత్వం తపాలా కార్యాలయాల ద్వారా పలు ప్రత్యేక పొదుపు, పెట్టుబడి పథకాలను అమలు చేస్తోంది. దీర్ఘకాలిక పొదుపుతో పాటు ఆకర్షణీయమైన వడ్డీ ప్రయోజనాలు అందించే ఈ పథకాలు మహిళల భవిష్యత్తుకు ఆర్థిక భరోసా కల్పిస్తున్నాయి.

ఈ పథకాలలో ప్రధానంగా సుకన్య సమృద్ధి యోజన (SSY) మరియు మహిళా సమ్మాన్ సేవింగ్స్ సర్టిఫికేట్ (MSSC) ప్రజల్లో విశేష ఆదరణ పొందుతున్నాయి.

సుకన్య సమృద్ధి యోజన (SSY),,,,,
బాలికల విద్య, ఉన్నత చదువులు, వివాహం వంటి భవిష్యత్ అవసరాలను దృష్టిలో ఉంచుకుని కేంద్ర ప్రభుత్వం ఈ పథకాన్ని ప్రవేశపెట్టింది. బాలిక పేరుతో చిన్న వయస్సు నుంచే ఖాతా ప్రారంభించి క్రమం తప్పకుండా పెట్టుబడులు పెట్టవచ్చు. పథకం నిబంధనల ప్రకారం ఖాతా మెచ్యూరిటీ అనంతరం, సాధారణంగా బాలికకు 21 సంవత్సరాలు పూర్తయ్యే సమయానికి నిధులను ఉపసంహరించుకునే అవకాశం ఉంటుంది. దీర్ఘకాలిక పెట్టుబడిపై ఆకర్షణీయమైన వడ్డీతో పాటు పన్ను రాయితీ ప్రయోజనాలు కూడా లభిస్తాయి.

మహిళా సమ్మాన్ సేవింగ్స్ సర్టిఫికేట్ (MSSC)….
మహిళలు, బాలికల కోసం ప్రత్యేకంగా రూపొందించిన ఈ స్వల్పకాలిక పొదుపు పథకం రెండేళ్ల కాలపరిమితితో అందుబాటులో ఉంది. కనీసం రూ.1,000 నుంచి గరిష్టంగా రూ.2 లక్షల వరకు (ప్రస్తుత నిబంధనల ప్రకారం) పెట్టుబడి పెట్టే అవకాశం ఉంది. ఈ పథకంపై ప్రభుత్వం వార్షికంగా 7.5 శాతం వడ్డీని అందిస్తోంది. తక్కువ కాలంలో సురక్షితమైన పెట్టుబడితో మంచి రాబడిని పొందాలనుకునే మహిళలకు ఇది అనుకూలమైన పథకంగా నిలుస్తోంది.

ఆర్థిక ప్రణాళికలో భాగంగా మహిళలు, బాలికలు ఈ ప్రభుత్వ పొదుపు పథకాలను సద్వినియోగం చేసుకోవాలని తపాలా శాఖ అధికారులు సూచిస్తున్నారు.