నేను ముసలోడినైపోయాను..
పోటీ చేయాలనే ఆలోచన లేదు
ఎంఐఎం శాసనసభాపక్ష నేత అక్బరుద్దీన్ ఓవైసీ వ్యాఖ్యలు
కోల్ బెల్ట్ న్యూస్ ప్రతినిధి:
(adsbygoogle = window.adsbygoogle || []).push({});
పాతబస్తీ రాజకీయాల్లో కీలక నేతగా గుర్తింపు పొందిన ఎంఐఎం శాసనసభాపక్ష నేత, చాంద్రాయణగుట్ట ఎమ్మెల్యే అక్బరుద్దీన్ ఓవైసీ చేసిన తాజా వ్యాఖ్యలు రాజకీయ వర్గాల్లో ఆసక్తికర చర్చకు దారితీశాయి. వచ్చే అసెంబ్లీ ఎన్నికల్లో తాను పోటీ చేస్తానో లేదో ఇప్పుడే చెప్పలేనని, ప్రస్తుతానికి ఎన్నికల్లో పోటీ చేయాలనే ఆలోచన కూడా లేదని ఆయన పేర్కొనడం చర్చనీయాంశంగా మారింది.
ఇటీవల జరిగిన ఓ కార్యక్రమంలో అక్బరుద్దీన్ ఓవైసీ మాట్లాడుతూ.. “నేను ముసలోడిని అయిపోయాను. వచ్చే ఎన్నికల్లో పోటీ చేస్తానో లేదో తెలియదు. అసలు పోటీ చేయాలనే ఆలోచన కూడా లేదు” అని వ్యాఖ్యానించారు. ఆయన చేసిన ఈ వ్యాఖ్యలు ఎంఐఎం రాజకీయాల్లో, ముఖ్యంగా చాంద్రాయణగుట్ట నియోజకవర్గం విషయంలో ప్రాధాన్యం సంతరించుకున్నాయి.
అక్బరుద్దీన్ ఓవైసీ ప్రస్తుతం ఆల్‌ ఇండియా మజ్లిస్‌-ఎ-ఇత్తెహాదుల్‌ ముస్లిమీన్‌ (ఎంఐఎం) పార్టీ శాసనసభాపక్ష నేతగా కొనసాగుతున్నారు. హైదరాబాద్‌ పాతబస్తీలోని చాంద్రాయణగుట్ట నియోజకవర్గానికి ఆయన సుదీర్ఘకాలంగా ప్రాతినిధ్యం వహిస్తున్నారు. 1999లో తొలిసారిగా చాంద్రాయణగుట్ట నుంచి శాసనసభకు ఎన్నికైన ఆయన.. ఆ తర్వాత 2004, 2009, 2014, 2018, 2023 ఎన్నికల్లోనూ వరుస విజయాలు సాధించారు.
దాదాపు రెండు దశాబ్దాలకుపైగా చాంద్రాయణగుట్ట రాజకీయాల్లో తనదైన ముద్ర వేసుకున్న అక్బరుద్దీన్.. ఎంఐఎం తరఫున శాసనసభలో కీలక పాత్ర పోషిస్తున్నారు. పార్టీ శాసనసభాపక్ష నేతగా ప్రభుత్వ విధానాలు, నియోజకవర్గ సమస్యలు, పాతబస్తీ అభివృద్ధి అంశాలపై అసెంబ్లీలో తన వాదనను వినిపిస్తూ వస్తున్నారు.
ఈ నేపథ్యంలో వచ్చే అసెంబ్లీ ఎన్నికల్లో తాను పోటీ చేయకపోవచ్చనే సంకేతాలు ఇచ్చేలా ఆయన చేసిన వ్యాఖ్యలు రాజకీయంగా ప్రాధాన్యం పొందాయి. అయితే ఆయన నిజంగానే ఎన్నికల బరిలో నుంచి తప్పుకుంటారా? లేక భవిష్యత్‌ పరిస్థితులను బట్టి నిర్ణయం తీసుకుంటారా? అన్నది ప్రస్తుతం స్పష్టత రావాల్సి ఉంది. అక్బరుద్దీన్ వ్యాఖ్యలను ఎంఐఎం వర్గాలు అధికారికంగా ఎలా పరిగణిస్తాయన్నది కూడా ఆసక్తికరంగా మారింది.
సుదీర్ఘకాలంగా ఒకే నియోజకవర్గం నుంచి వరుస విజయాలు సాధిస్తున్న అక్బరుద్దీన్ ఓవైసీ భవిష్యత్‌ రాజకీయ నిర్ణయం చాంద్రాయణగుట్టతో పాటు పాతబస్తీ రాజకీయాలపై ప్రభావం చూపే అవకాశం ఉందన్న చర్చ రాజకీయ వర్గాల్లో సాగుతోంది. అయితే ప్రస్తుతం ఆయన చేసిన వ్యాఖ్యలను భవిష్యత్‌ ఎన్నికలపై తుది నిర్ణయంగా భావించాల్సిన అవసరం లేదని, ఆయన తదుపరి నిర్ణయం కోసం వేచి చూడాల్సి ఉంటుందని రాజకీయ పరిశీలకులు పేర్కొంటున్నారు.
(adsbygoogle = window.adsbygoogle || []).push({});