మందమర్రి, సెప్టెంబర్ 24: సింగరేణి కార్మికుల సమస్యల పరిష్కారం కోసం కార్మిక హక్కుల పరిరక్షణకు నిరంతరం పోరాటాలు కొనసాగిస్తామని సింగరేణి కాలరీస్ వర్కర్స్ యూనియన్ (ఏఐటీయూసీ) రాష్ట్ర అధ్యక్షుడు, వేజ్బోర్డు నాయకుడు వాసిరెడ్డి సీతారామయ్య అన్నారు. గురువారం ఉదయం మందమర్రి ఏరియాలోని కేకే-5 గనిలో ఏఐటీయూసీ ఆధ్వర్యంలో నిర్వహించిన గేట్ మీటింగ్లో ఆయన ముఖ్య అతిథిగా పాల్గొని మాట్లాడారు.
గత నెల 27న హైదరాబాద్లో ఆర్ఎల్సీ సమక్షంలో సింగరేణి యాజమాన్యంతో జరిగిన చర్చల్లో సమ్మె నోటీసులో పేర్కొన్న 32 డిమాండ్లలో 23 డిమాండ్లపై అంగీకారం కుదిరిందని తెలిపారు. ఈ ఒప్పందం ద్వారా కార్మికులకు ప్రయోజనం చేకూరే పలు సమస్యలకు పరిష్కారం లభించిందన్నారు. ముఖ్యంగా పెర్క్స్పై ఇన్కమ్ ట్యాక్స్ విషయంలో కోల్ ఇండియాలో అమలవుతున్న విధానాన్ని సింగరేణిలోనూ అమలు చేయించుకోవడం కీలకమైన విజయమని పేర్కొన్నారు.
(adsbygoogle = window.adsbygoogle || []).push({});
లాభాల్లో కార్మికులకు వాటా (పీఎల్ఆర్)ను దసరా పండుగ నాటికి అందించేలా చర్యలు తీసుకుంటామని ఒప్పందంలో హామీ లభించిందన్నారు. మిగిలిన డిమాండ్లపై కూడా సర్క్యులర్లు జారీ చేసేలా యాజమాన్యంతో అంగీకారం కుదిరిందని తెలిపారు. సాధించిన ఒప్పందాలపై కార్మికులు సంతృప్తి వ్యక్తం చేస్తున్నప్పటికీ, కొన్ని సంఘాలు దుష్ప్రచారం చేస్తున్నాయని ఆయన విమర్శించారు.
సింగరేణిలో కార్మికుల హక్కుల కోసం ఏఐటీయూసీకి 80 ఏళ్ల చరిత్ర ఉందని, నాలుగు సార్లు గుర్తింపు సంఘంగా కార్మికులు ఎన్నుకున్నారని సీతారామయ్య తెలిపారు. భవిష్యత్తులో కూడా కార్మికుల హక్కుల కోసం ఎలాంటి పోరాటానికైనా సిద్ధంగా ఉంటామని స్పష్టం చేశారు.
12వ వేజ్బోర్డు కోసం పోరాటం
12వ వేజ్బోర్డు ఏర్పాటు కోసం జాతీయ కార్మిక సంఘాలతో కలిసి పోరాటాలను ఉధృతం చేస్తామని సీతారామయ్య అన్నారు. కేంద్ర ప్రభుత్వం తీసుకొచ్చిన నాలుగు లేబర్ కోడ్లపై కార్మిక సంఘాలకు అభ్యంతరాలు ఉన్నాయని తెలిపారు. వేజ్బోర్డు కమిటీ ఏర్పాటు విషయంలో 50 శాతం ఓట్ల నిబంధనను తీసుకురావడం కార్మిక సంఘాలపై ప్రభావం చూపే అంశమని పేర్కొన్నారు.
దీపావళి బోనస్ (పీఎల్ఆర్) గత ఏడాది కంటే మెరుగ్గా సాధించేందుకు కృషి చేస్తామని చెప్పారు. సింగరేణికి ప్రభుత్వాల నుంచి రావాల్సిన రూ.54 వేల కోట్ల బకాయిలను సాధించే వరకు పోరాటాలు కొనసాగిస్తామని తెలిపారు.
కొత్త గనుల కోసం పోరాటం
గతంలో సింగరేణిలో కొత్త బొగ్గు గనుల ఏర్పాటుకు తగిన స్థాయిలో చర్యలు జరగలేదని సీతారామయ్య అన్నారు. కార్మిక సంఘాల పోరాటాల ఫలితంగా తాడిచెర్ల ఓపెన్కాస్ట్, మణుగూరు డీప్సైడ్ ఓపెన్కాస్ట్ గనులు వచ్చాయని తెలిపారు. టెండర్ ప్రక్రియలో ఉన్న శ్రావణపల్లి ఓసీ, సత్తుపల్లి ఓసీ గనులు కూడా త్వరలో సింగరేణికి దక్కే అవకాశం ఉందన్నారు.
ఈ సందర్భంగా ఏరియా జనరల్ మేనేజర్ కార్యాలయంలో జరిగిన స్ట్రక్చర్ సమావేశాల్లో పరిష్కరించిన సమస్యలు, సాధించిన ఫలితాలను బ్రాంచ్ కార్యదర్శి శైలేంద్ర సత్యనారాయణ, భీమనాదుని సుదర్శన్ కార్మికులకు వివరించారు.
బ్రాంచ్ జాయింట్ సెక్రటరీ కంది శ్రీనివాస్ అధ్యక్షతన జరిగిన ఈ గేట్ మీటింగ్లో ఏరియా నాయకులు సోమిశెట్టి రాజేశం, స్ట్రక్చర్ కమిటీ సభ్యుడు సీవీ రమణ, కేకే-5 గని నాయకులు ప్రేమ్లాల్, రాంబాబు, సట్ల కొండయ్య, భగవాన్రెడ్డి, హేమచందు, వర్క్మెన్ ఇన్స్పెక్టర్ విక్రమ్సింగ్, జువాజీ శ్రీనివాస్, సివిల్ ఫిట్ కార్యదర్శి కలవల శ్రీనివాస్, సేఫ్టీ కమిటీ, మైన్ కమిటీ సభ్యులు, ఏఐటీయూసీ నాయకులు, కార్యకర్తలు, కార్మికులు పాల్గొన్నారు
(adsbygoogle = window.adsbygoogle || []).push({});