తిరుమల శ్రీవారి పుష్కరిణి విశిష్టత ఇదే

సకల తీర్థాల సంగమంగా ప్రసిద్ధి..
పుష్కరిణిలో స్నానంతో పాప విమోచనం పొందుతారని భక్తుల విశ్వాసం

కోల్ బెల్ట్ న్యూస్ డెస్క్:

ప్రపంచవ్యాప్తంగా ప్రసిద్ధి చెందిన కలియుగ ప్రత్యక్ష దైవం శ్రీ వేంకటేశ్వర స్వామిని దర్శించుకునేందుకు ప్రతిరోజూ వేలాది మంది భక్తులు తిరుమలకు తరలివస్తుంటారు. స్వామివారిని దర్శించుకుని మొక్కులు చెల్లించడంతో పాటు ఆలయానికి ఉత్తర భాగంలో ఉన్న పవిత్రమైన శ్రీవారి పుష్కరిణిలో స్నానం చేయడం అత్యంత పుణ్యకార్యంగా భక్తులు భావిస్తారు. సాంప్రదాయం ప్రకారం భక్తులు ముందుగా శ్రీవారి పుష్కరిణిలో స్నానం చేసి, అనంతరం శ్రీ వరాహస్వామిని దర్శించుకుని, ఆ తర్వాత శ్రీ వేంకటేశ్వర స్వామివారి దర్శనానికి వెళ్తారు. ఈ విధంగా దర్శనం చేసుకోవడం శాస్త్రోక్త సంప్రదాయంగా కొనసాగుతోంది.

పురాణాల ప్రకారం శ్రీవారి పుష్కరిణి సకల పాపాలను నశింపజేసే మహా పవిత్ర తీర్థంగా ప్రసిద్ధి చెందింది. తారకాసురుడిని సంహరించిన అనంతరం బ్రహ్మహత్యా దోషానికి గురైన శ్రీ సుబ్రహ్మణ్యస్వామి ఈ పుష్కరిణిలో స్నానం చేసి ఆ దోషం నుంచి విముక్తి పొందినట్లు పురాణ కథనాలు పేర్కొంటున్నాయి.

అలాగే వరాహ పురాణం ప్రకారం ముల్లోకాలలోని సమస్త పవిత్ర తీర్థాలు శ్రీవారి పుష్కరిణిలో కలిసివున్నాయని, ఈ విషయాన్ని స్వయంగా శ్రీ వరాహస్వామి భూదేవికి వివరించినట్లు పేర్కొనబడింది. ఈ కారణంగానే శ్రీవారి పుష్కరిణికి విశిష్ట స్థానం ఏర్పడింది. ఈ విశ్వాసాల నేపథ్యంలో ప్రతి ఏడాది లక్షలాది మంది భక్తులు తిరుమలకు చేరుకుని శ్రీవారి పుష్కరిణిలో పవిత్ర స్నానం ఆచరించి, అనంతరం శ్రీ వరాహస్వామి, శ్రీ వేంకటేశ్వర స్వామివారిని దర్శించుకుని తమ ఆధ్యాత్మిక యాత్రను పూర్తి చేస్తుంటారు